წინამდებარე დოკუმენტი განსაზღვრავს აუქციონზე მონაწილეობის წესებსა და პირობებს, რომელიც სავალდებულოა შესასრულებლად აუქციონზე მონაწილეობის მსურველი ნებისმიერი ფიზიკური პირისათვის.

1. ტერმინთა განმარტება
   1. აუქციონის ჩატარების მიზნებისთვის ქვემოთ ჩამოთვლილ ტერმინებს აქვთ შემდეგი მნიშვნელობა:

• კომპანია – შპს „ლაიონ აუქციონი“ (ს/კ: 402337075);
• აუქციონი  –  შპს „ლაიონ აუქციონი“-ს მიერ ჩატარებული როგორც ლაივ აუქციონი, ასევე ონლაინ აუქციონი. 
• ონლაინ აუქციონი – კომპანიის ვებ-გვერდზე ჩატარებული ელექტრონული აუქციონი. 
• ლაივ აუქციონი – კომპანიის მიერ ლაივ რეჟიმში ჩატარებული აუქციონი. 
• ლოტი – აუქციონზე განთავსებული ავტომობილის ან სხვა სატრანსპორტო საშუალების მაიდენტიფიცირებელი ნომერი;
• ბიდი – აუქციონის მონაწილის მიერ განთავსებული ფასი;
• მომხმარებელი/მონაწილე – აუქციონზე რეგისტრირებული ფიზიკური პირი;
• ვებ-გვერდი – შპს „ლაიონ აუქციონი“-ს ოფიციალური ვებ-გვერდი: https://lionauctions.com/; 
• კანონმდებლობა – საქართველოს მოქმედი საკანონმდებლო და კანონქვემდებარე ნორმატიული აქტები;
• სადეპოზიტო თანხა  – აუქციონზე მონაწილეობის მისაღებად განსაზღვრული თანხა.

2. აუქციონზე რეგისტრაციისა და მონაწილეობის პირობები
   1. წინამდებარე მუხლით განსაზღვრული წესები და პირობები ეხება როგორც მე-3 მუხლით განსაზღვრულ ლაივ აუქციონს, ასევე მე-4 მუხლით განსაზღვრულ ონლაინ აუქციონს. 
   2. პირი, ვებ-გვერდზე რეგისტრაციის გავლით, უფლებამოსილია მიიღოს მონაწილეობა აუქციონზე, განათავსოს ბიდი მისთვის სასურველ ლოტზე და გამარჯვების შემთხვევაში შეიძინოს სატრანსპორტო საშუალება მესაკუთრისგან. 
   3. მონაწილეობის მისაღებად მონაწილეობის მსურველი პირი უნდა დარეგისტრირდეს აუქციონის ელექტრონულ სისტემაში, შეიყვანოს მისი პერსონალური მონაცემები (სახელი, გვარი, მობილურის ნომერი, პირადი ან პასპორტის ნომერი და ელექტრონული ფოსტა (მხოლოდ ლაივ აუქციონის შემთხვევაში) და გადაიხადოს სადეპოზიტო თანხა. 
   4. პირი, რომელიც ელექტრონულ სისტემაში შეიყვანს მის მონაცემებს ვალდებულია გაეცნოს აუქციონის წესებსა და პირობებს, რომელიც ხელმისაწვდომია სარეგისტრაციო ფორმის შევსებისას. „ვეთანხმები წესებსა და პირობებს“ ღილაკზე დაჭერით, პირი ადასტურებს, რომ გაეცნო და ეთანხმება კომპანიის წესებსა და პირობებს. თანხმობა წარმოადგენს პირის ნებაყოფლობით გამოხატულ სურვილს, რომელიც იწვევს სამართლებრივად სავალდებულო შედეგებს.
   5. აუქციონზე რეგისტრაციის უფლება აქვს 18 (თვრამეტ) წელს მიღწეულ, სრულწლოვან, ქმედუნარიან ფიზიკურ პირს, რომელსაც საქართველოს კანონმდებლობის მიხედვით არ აქვს შეზღუდული აუქციონზე მონაწილეობა და სატრანსპორტო საშუალების შეძენა.
   6. პირმა ელექტრონულ სისტემაში რეგისტრაციისას უნდა გაიაროს ვერიფიკაცია მის მიერ მითითებულ მობილურის ნომერზე ელექტრონული სისტემიდან გაგზავნილი ერთჯერადი კოდის შესაბამის ველში შეყვანის ფორმით. 
   7. აუქციონზე განთავსებულია სხვადასხვა მესაკუთრის სატრანსპორტო საშუალებები, რომლის აუქციონის ფორმით შეძენის უფლებაც აქვთ მომხმარებლებს. კომპანია კი უზრუნველყოფს აუქციონის ფუნქციონირებას.  
   8. სატრანსპორტო საშუალება შეიძლება იყოს როგორც საქართველოში, ასევე გზაში საქართველოს მიმართულებით ან საქართველოს საზღვრებს გარეთ. აღნიშნულის შესახებ ინფორმაცია მითითებული იქნება აუქციონის ვებ-გვერდზე. 
   9. აუქციონზე მონაწილეობისთვის აუცილებელია სადეპოზიტო თანხის გადახდა. მომხმარებლის მიერ აუქციონზე სატრანსპორტო საშუალების მოგების შემთხვევაში, სადეპოზიტო თანხა ჩაითვლება საბოლოო ანგარიშსწორებაში. 
   10. აუქციონზე სატრანსპორტო საშუალების მოგების შემდეგ, მომხმარებელი ვალდებულია გადაიხადოს სატრანსპორტო საშუალების სრული ღირებულება, რის შემდეგაც მან უნდა განახორციელოს საკუთრების რეგისტრაცია. რეგისტრაცია განხორციელდება სსიპ მომსახურების სააგენტოს მიერ დადგენილი სამუშაო საათების განმავლობაში. 
   11. მომხმარებელი უფლებამოსილია სატრანსპორტო საშუალება გაიყვანოს აუქციონის ტერიტორიიდან მისი სრული ღირებულების (მათ შორის, როგორც აუქციონის ასევე, პროცესთან დაკავშირებული სხვა გადასახადების) გადახდისა და ავტომობილის რეგისტრაციის შემდეგ. 
   12. იმ შემთხვევაში, თუ დეპოზიტი შეტანილია მესამე პირის მიერ, ხოლო სატრანსპორტო საშუალების აუქციონში მონაწილეობას და მის რეგისტრაციას ახორციელებს სხვა პირი, აღნიშნული გარემოება წინასწარ უნდა შეთანხმდეს კომპანიასთან. დეპოზიტის გადახდის დანიშნულებაში სავალდებულოა მიეთითოს იმ პირის სახელი, გვარი და პირადი ნომერი, რომელიც მიიღებს მონაწილეობას აუქციონში და რომლის სახელზეც მოხდება სატრანსპორტო საშუალების რეგისტრაცია. ანალოგიურად, კომპანიას წინასწარ უნდა ეცნობოს შემთხვევა, როდესაც დეპოზიტი შეტანილია აუქციონის მონაწილის მიერ, თუმცა სატრანსპორტო საშუალების რეგისტრაცია უნდა განხორციელდეს სხვა პირზე.
   13. თითოეულ სატრანსპორტო საშუალებას აქვს საწყისი ფასი. მომხმარებლის მიერ განთავსებული ბიდი უნდა იყოს საწყის ფასზე მეტი. 
   14. მომხმარებელი ვერ შეძლებს ბიდის განთავსების შემდეგ მის რედაქტირებას, შემცირებას ან/და გაუქმებას. 
   15. მოხმარებლის მხრიდან ბიდის განთავსება მიჩნეულია მის თანხმობად, რომ ის თანახმაა მის მიერ განთავსებულ ფასად შეიძინოს კონკრეტული სატრანსპორტო საშუალება.  
   16. აუქციონზე თითოეულ სატრანსპორტო საშუალებას აქვს წინასწარ განსაზღვრული 2 ტიპის სტატუსიდან ერთ-ერთი: „Pure Sale” ან „On Approval”, რომელიც განსაზღვრავს სატრანსპორტო საშუალების შესაძენად საჭიროა თუ არა კომპანიის ან/და სატრანსპორტო საშუალების მესაკუთრის დადასტურება.  
   17. თუ სატრანსპორტო საშუალების სტატუსად განსაზღვრულია „Pure Sale“ აღნიშნული გულისხმობს, რომ აუქციონზე სატრანსპორტო საშუალების საბოლოო ბიდით შეძენა არ საჭიროებს კომპანიის ან/და სატრანსპორტო საშუალების მესაკუთრის მხრიდან დადასტურებას.  
   18. თუ სატრანსპორტო საშუალების სტატუსად განსაზღვრულია „On approval“ – აღნიშნული გულისხმობს, რომ აუქციონზე სატრანსპორტო საშუალების საბოლოო ბიდით შეძენისათვის აუცილებელია, კომპანიის ან/და სატრანსპორტო საშუალების მესაკუთრის მხრიდან ბიდის დადასტურება, რომ ის თანახმაა აუქციონის გამარჯვებულს გადასცეს კონკრეტული სატრანსპორტო საშუალება აუქციონზე განთავსებული საბოლოო ბიდის ოდენობით. აღნიშნული სტატუსის შემთხვევაში კომპანიას ან/და სატრანსპორტო საშუალების მესაკუთრეს უფლება აქვს უარი თქვას სატრანსპორტო საშუალების გაყიდვაზე საბოლოო ბიდის ოდენობით, ხოლო მომხმარებელი არ არის უფლებამოსილი წარადგინოს  პრეტენზია, ვინაიდან მისთვის წინასწარ ცნობილი იყო კონკრეტული სატრანსპორტო საშუალების სტატუსი. 
   19. თუ სატრანსპორტო საშუალების სტატუსად განსაზღვრულია “On Approval”, კომპანია  აუქციონის მონაწილეს პასუხს აცნობებს 5 (ხუთი) სამუშაო დღის ვადაში. 
3. ლაივ აუქციონზე მონაწილეობის პირობები და წესები
   1. ლაივ აუქციონზე მონაწილეობისას სადეპოზიტო თანხა განისაზღვრება აუქციონის მიხედვით, რაც გულისხმობს იმას, რომ მიმდინარე დღის აუქციონზე წარმოდგენილ ყველა სატრანსპორტო საშუალებაზე მონაწილეობისთვის საჭიროა სადეპოზიტო თანხის მხოლოდ ერთხელ გადახდა.   
   2. ლაივ აუქციონზე მონაწილეობისას აუქციონის სადეპოზიტო თანხის გადახდა ხორციელდება აუქციონის დაწყებამდე ნაღდი ან უნაღდო ანგარიშსწორების წესით. 
   3. იმ შემთხვევაში, თუ მომხმარებელი ვერ მოიგებს სატრანსპორტო საშუალებას და აღარ სურს სხვა აუქციონში მონაწილეობა, მას დაუბრუნდება მის მიერ გადახდილი სადეპოზიტო თანხის სრული ოდენობა წინამდებარე წესებისა და პირობების გათვალისწინებით. 
   4. თუ მომხმარებელი აუქციონზე ერთზე მეტ სატრანსპორტო საშუალებას მოიგებს და რომელიმე სატრანსპორტო საშუალების შესყიდვას გააუქმებს, გადახდილი სადეპოზიტო თანხა (მიუხედავად გადახდის დანიშნულებისა) სრულად მიიჩნევა პირგასამტეხლოდ და არ ჩაითვლება სხვა სატრანსპორტო საშუალების ღირებულებაში. 
   5. თითოეულ მონაწილეს ენიჭება უნივერსალური კოდი, რომელიც განთავსებულია აუქციონის პადელზე და რომლითაც ხდება მისი იდენტიფიკაცია. აუქციონის მსვლელობისას მომხმარებლისთვის მინიჭებული პადელის აწევით ან/და სასურველი თანხის გაჟღერებით ხდება ლოტზე ბიდის განთავსება.   
   6. აუქციონზე სავარაუდო განსათავსებელი ბიდის ოდენობა შესაძლებელია გაჟღერდეს აუქციონის წამყვანის მხრიდან. თუ პირი თანხმობას გამოთქვამს წამყვანის მიერ გაჟღერებულ ბიდზე, იგი ასევე ჩაითვლება განთავსებულად.
   7. რამდენიმე მომხმარებლის მიერ ერთი და იმავე ოდენობის ბიდის განთავსებისას, განთავსდება იმ მომხმარებლის ბიდი, რომელმაც პირველად დააფიქსირა აღნიშნული.
   8. აუქციონის პროცესს სრულად წარმართავს აუქციონის წამყვანი, რომელიც თავდაპირველად აუქციონის მომხმარებლებს აწვდის ინფორმაციას ლოტის შესახებ. აღნიშნულის შემდეგ, აუქციონის მომხმარებლები იწყებენ ბიდების განთავსების პროცესს, ბიდის განთავსება მომხმარებლის მიერ ხდება პადელის მეშვეობით. 
   9. აუქციონზე გამარჯვებული არის საბოლოო ბიდის მფლობელი მომხმარებელი ე.ი. ის ვინც მითითებულ დროს განათავსებს ყველაზე მაღალ თანხას. 
   10. აუქციონი მიმდინარეობს მანამ, სანამ არ გამოვლინდება გამარჯვებული. იმ შემთხვევაში თუ აუქციონზე არ იქნება რეგისტრირებული არც ერთი მონაწილე, აუქციონი ვადის დასრულების შემდეგ დაიხურება. 
   11. თითოეული ბიდის ოდენობა არ უნდა იყოს აუქციონზე უკვე განთავსებულ ბიდზე 100.00 (ასი) აშშ დოლარის ექვივალენტი ლარში ნაკლები, გარდა 3.5 პუნქტით განსაზღვრული შემთხვევისა. 
   12. აუქციონის დასრულების შემდეგ მომხმარებლისთვის ცნობილი იქნება აუქციონის შედეგები. მომხმარებელი აუქციონის მიმდინარეობისა და შედეგის შესახებ შეტყობინებებს მიიღებს მის მიერ მითითებულ საკონტაქტო ნომერზე. 
   13. მომხმარებელი პასუხისმგებელია ყველა იმ ქმედებაზე, რომელიც განხორციელდა აუქციონის მიმდინარეობის დროს მისი მხრიდან. 

4. ონლაინ აუქციონზე მონაწილეობის წესები და პირობები
   1. ონლაინ აუქციონზე სადეპოზიტო თანხა განისაზღვრება სატრანსპორტო საშუალების მიხედვით, რაც გულისხმობს იმას, რომ მომხმარებელმა უნდა გადაიხადოს სადეპოზიტო თანხა თითოეული სატრანსპორტო საშუალებისთვის. 
   2. ონლაინ აუქციონის შემთხვევაში სადეპოზიტო თანხის გადახდა ხორციელდება აუქციონის დაწყებამდე მხოლოდ უნაღდო ანგარიშსწორების წესით.
   3. თუ მომხმარებელი ვერ მოიგებს სატრანსპორტო საშუალებას მას დაუბრუნდება მის მიერ გადახდილი სადეპოზიტო თანხის სრული ოდენობა წინამდებარე წესებისა და პირობების გათვალისწინებით. 
   4. აუქციონში მონაწილეობისას და ბიდის განთავსებისას მომხმარებლის მონაცემები არ ხდება სხვა მონაწილეთათვის ცნობილი. 
   5. მომხმარებელმა სასურველი ბიდის ოდენობა უნდა განათავსოს აუქციონზე რეგისტრაციის  ფორმის შევსებისას, ვებ-გვერდზე ბიდის შესაბამის გრაფაში ჩაწერის გზით. 
   6. გარდა განთავსებული ბიდისა, აუქციონის მონაწილეთათვის ხელმისაწვდომი იქნება აუქციონის დაწყებისა და დასრულების დრო და სხვა დამატებითი ინფორმაცია როგორც სატრანსპორტო საშუალების, ასევე აუქციონის დეტალების შესახებ. 
   7. თითოეული სატრანსპორტო საშუალების აუქციონს აქვს განსაზღვრული დრო თუ რა დროს დაიწყება და დასრულდება აუქციონი. აუქციონზე გამარჯვებული არის საბოლოო ბიდის მფლობელი მონაწილე ე.ი. ის ვინც მითითებული დროის განმავლობაში განათავსებს ყველაზე მაღალ თანხას. 
   8. იმ შემთხვევაში თუ აუქციონზე არ იქნება რეგისტრირებული არც ერთი მონაწილე, აუქციონი ვადის დასრულების შემდეგ დაიხურება.  
   9. მოხმარებლის მხრიდან ბიდის განთავსება მიჩნეულია მის თანხმობად, მის მიერ განთავსებულ ფასად შეიძინოს ეს კონკრეტული სატრანსპორტო საშუალება. 
   10. თითოეული ბიდის ოდენობა არ უნდა იყოს აუქციონზე უკვე განთავსებულ ბიდზე 100.00 (ასი) აშშ დოლარის ექვივალენტი ლარში ნაკლები.
   11. თითოეულ ავტომობილს აქვს მითითებული მინიმალური ბიდის ოდენობა, მომხმარებლის მიერ განთავსებული ბიდი უნდა იყოს ამ ოდენობაზე მეტი. 
   12. აუქციონზე მონაწილეობის დროს, სხვა მომხმარებლის მიერ ბიდის განთავსებისას წინა მომხმარებელს მისდის შეტყობინება აუქციონზე ბიდის ოდენობის ცვლილების შესახებ.  
   13. მომხმარებლის მიერ ბიდის განთავსებისას მას გამოუჩნდება შეტყობინება, რომ მისი მიმდინარე ბიდი მაღალია, სხვა მომხმარებლის მიერ უფრო მაღალი ბიდის განთავსებამდე ან/და დროის ამოწურვამდე. 
   14. მომხმარებელი აუქციონის მიმდინარეობისა და შედეგის შესახებ შეტყობინებებს მიიღებს მის მიერ მითითებულ საკონტაქტო ნომერზე. 
   15. აუქციონზე ავტომობილის მოგების შემდეგ აუქციონის გამარჯვებულ მომხმარებელს დაუკავშირდება კომპანიის წარმომადგენელი, რომელიც მიაწვდის მას ინფორმაციას  სატრანსპორტო საშუალების სრული ღირებულების გადახდის, მისი რეგისტრაციისა და გაყვანის პროცედურების შესახებ. 
   16. მომხმარებელი პასუხისმგებელია ყველა იმ ტრანზაქციაზე და ქმედებაზე, რომელიც განხორციელდა ვებ-გვერდზე მისი მხრიდან. 
   17. მომხმარებელი აუქციონის დასრულების შემდეგ აუქციონის შედეგების შესახებ ინფორმაციას მიიღებს მის საკონტაქტო ნომერზე.
5. აუქციონის მომხმარებელი
   1. მომხმარებელი ვალდებულია მიაწოდოს კომპანიას აუქციონზე მონაწილეობისა და სატრანსპორტო საშუალების შეძენის პროცესისთვის საჭირო ინფორმაცია და დოკუმენტი (პირადობის დამადასტურებელი მოწმობა ან პასპორტი ან მართვის მოწმობა, სადეპოზიტო თანხის გადახდის დამადასტურებელი ქვითარი და ა.შ.). 
   2. მომხმარებელი იღებს პასუხისმგებლობას მის მიერ კომპანიისათვის მიწოდებული ინფორმაციისა და დოკუმენტაციის სისწორესა და ვალიდურობაზე. 
   3. მომხმარებლის მიერ კომპანიისათვის მცდარი/შეცდომაში შემყვანი/ყალბი ინფორმაციის მიწოდება იწვევს საქართველოს კანონმდებლობით გათვალისწინებულ პასუხისმგებლობას. ამასთანავე, კომპანია უფლებამოსილია ასეთ შემთხვევაში, მონაწილეს შეუზღუდოს აუქციონში მონაწილეობის მიღება და პირგასამტეხლოს სახით დააკისროს და არ დაუბრუნოს მის მიერ გადახდილი სადეპოზიტო თანხის ოდენობა.  
   4. მომხმარებელი პასუხისმგებელია ყველა იმ ქმედებაზე, რომელიც განხორციელდა მისი მხრიდან როგორც აუქციონის მიმდინარეობის, ასევე კომპანიასთან ურთიერთობის პროცესში.  
   5. მომხმარებელს ნებისმიერ დროს შეუძლია განაახლოს მის შესახებ ინფორმაცია კომპანიის წარმომადგენელთან წერილობითი მოთხოვნის საფუძველზე. 
   6. მომხმარებელს შეუძლია მოითხოვოს მის მიერ გადახდილი სადეპოზიტო თანხის დაბრუნება, იმ შემთხვევაში თუ ის წინამდებარე წესების მიხედვით უფლებამოსილია მიიღოს ამგვარი თანხა და არ არის რეგისტრირებული რომელიმე აუქციონის გამარჯვებულად, რომლის საბოლოო ანგარიშსწორებაც ჯერ არ განხორციელებულა. 
   7. მომხმარებელი აუქციონზე რეგისტრაციით ადასტურებს, რომ აუქციონში მისი მონაწილეობით არ ირღვევა მისთვის კანონით გათვალისწინებული რაიმე ვალდებულება, სასამართლოს მიერ მიღებული გადაწყვეტილება, რომელიმე სახელმწიფოს ორგანოს მიერ გაცემული ბრძანება, მითითება ან/და დადგენილება, საერთაშორისო კანონმდებლობა.
   8. მომხმარებელი ელექტრონულ სისტემაში რეგისტრაციით ადასტურებს, რომ არ მონაწილეობს იმგვარ სასამართლო დავაში, რომელიც ხელს შეუშლის აუქციონის შედეგების განხორციელებას და წინამდებარე წესების დაცვას. 
   9. მომხმარებელს არ აქვს უფლება აუქციონის ფასის ხელოვნურად გაზრდის მიზნით მიიღოს მონაწილეობა აუქციონში. ასეთი შემთხვევის აღმოჩენისთანავე, კომპანია უფლებამოსილია არ მისცეს მომხმარებელს აუქციონით სარგებლობის საშუალება და არ დაუბრუნოს მის მიერ გადახდილი სადეპოზიტო თანხა, ასევე, განახორციელოს კანონმდებლობით გათვალისწინებული სხვა ქმედებები. 
   10. მომხმარებელი უფლებამოსილია მიიღოს  აუქციონზე არსებული სატრანსპორტო საშუალების შესახებ საქართველოს კანონმდებლობითა და წინამდებარე წესებით გათვალისწინებული ინფორმაცია.  
   11. მომხმარებელი აუქციონზე რეგისტრაციით აცხადებს თანხმობას, რომ სრულად დაიცავს წინამდებარე წესებსა და პირობებს. 
   12. მომხმარებელი აცხადებს, რომ პირდაპირ ან არაპირდაპირ არ მონაწილეობს რაიმე უკანონო და დანაშაულებრივ საქმიანობაში, რომელიც ეწინააღმდეგება კანონმდებლობას, მათ შორის, უკანონო შემოსავლების ლეგალიზაციაში, იარაღით ვაჭრობაში, ნარკოტიკებით ვაჭრობაში ან/და ტერორიზმში; მის მიერ გარიგების დადების მიზანი არ არის ტერორიზმის ან/და სხვა ნებისმიერი უკანონო საქმიანობის დაფინანსება; ის შეყვანილი არ არის ტერორისტთა ან ტერორიზმის ხელშემწყობ პირთა სიაში ან/და არანაირად დაკავშირებული არ არის მათთან, ასევე არ მონაწილეობს არანაირ კანონსაწინააღმდეგო ქმედებაში.
   13. კომპანიას აქვს უფლებამოსილება მომხმარებლის მიერ ნებისმიერი ვალდებულების და გარანტიის დარღვევისას მოითხოვოს ზიანის ანაზღაურება, მათ შორის რეპუტაციული ზიანის, რომელიც მომხმარებელმა უნდა აანაზღაუროს აუქციონის მხრიდან მოთხოვნისთანავე, დაუყოვნებლივ. 
   14. კომპანია იტოვებს უფლებას შეუზღუდოს კონკრეტულ პირს აუქციონზე მონაწილეობა წინასწარი გაფრთხილების ან კონკრეტული საფუძვლის გარეშე.
6. აუქციონის სადეპოზიტო თანხის და სატრანსპორტო საშუალების ღირებულების გადახდის და დაბრუნების წესი
   1. სადეპოზიტო თანხის გადახდისა და დაბრუნების წესი:
      1. აუქციონის სადეპოზიტო თანხის გადახდა ხორციელდება აუქციონის დაწყებამდე  აუქციონის ტიპის მიხედვით, ნაღდი ან უნაღდო ანგარიშსწორების წესით.  
      2. სადეპოზიტო თანხა შეადგენს შეადგენს 500.00 (ხუთასი) ლარს.
      3. უნაღდო ანგარიშსწორებისას სადეპოზიტო თანხის გადახდა ხდება კომპანიის საბანკო ანგარიშზე ელექტრონული სისტემის მეშვეობით თანხის ჩარიცხვის გზით. აღნიშნული ხორციელდება საქართველოს კანონმდებლობით რეგისტრირებული ბანკების საბანკო ტერმინალზე გადახდის, ასევე ელექტრონულ სისტემაში მომხმარებლის საბანკო ბარათის მონაცემების შეყვანის ან Apple pay & Google Pay სისტემების მეშვეობით.  
      4. ნაღდი ანგარიშსწორების შემთხვევაში, სადეპოზიტო თანხის დაბრუნება ხდება მოთხოვნის დაფიქსირებიდან 10 კალენდარული დღის განმავლობაში.
      5. უნაღდო ანგარიშსწორების შემთხვევაში სადეპოზიტო თანხის დაბრუნება ხორციელდება მოთხოვნიდან 3-7 სამუშაო დღის განმავლობაში, იმავე საბანკო ანგარიშზე, რომლიდანაც განხორციელდა თანხის ჩარიცხვა. სადეპოზიტო თანხის დაბრუნების ვადასთან დაკავშირებით მომხმარებელმა ასევე უნდა გაითვალისწინოს მისი ანგარიშის მფლობელი ბანკის პროცედურული ვადები. 
   2. სატრანსპორტო საშუალების ღირებულების გადახდის წესი:
      1. აუქციონის საბოლოო ღირებულების გადახდა ხორციელდება ნაღდი ან უნაღდო ანგარიშსწორების წესით, აუქციონის ან აუქციონის მითითების შესაბამისად სატრანსპორტო საშუალების მესაკუთრის საბანკო ანგარიშზე თანხის ჩარიცხვის გზით. 
      2. აუქციონის გამარჯვებულმა მომხმარებელმა სატრანსპორტო საშუალების ღირებულება უნდა გადაიხადოს კონკრეტული აუქციონის დასრულებიდან 3 (სამი) სამუშაო დღის განმავლობაში, წინააღმდეგ შემთხვევაში, აუქციონი უფლებამოსილია 3 დღის გასვლის შემდეგ ნებისმიერ დროს გააუქმოს აუქციონის შედეგები და არ დაუბრუნოს მომხმარებელს სადეპოზიტო თანხა.  
7. დამატებითი დებულებები
   1. კომპანია იტოვებს სრულ უფლებას გააუქმოს დასრულებული აუქციონის შედეგები, ყოველგვარი პირგასამტეხლოსა და ზიანის ანაზღაურების გარეშე, აუქციონის დასრულებიდან 5 (ხუთი) სამუშაო დღის ვადაში. ხოლო მომხმარებლის  ბრალეული ქმედების შემთხვევაში ნებისმიერ დროს. კომპანიის მიერ აუქციონის შედეგების გაუქმების შემთხვევაში კომპანია არ არის პასუხისმგებელი მიუღებელ შემოსავალზე და სხვა დანაკარგებზე. 
   2. კომპანიის მიერ აუქციონის შედეგების გაუქმების შემთხვევაში მომხმარებელს დაუბრუნდება მის მიერ გადახდილი თანხის სრული ოდენობა გარდა იმ შემთხვევისა, როდესაც სახეზეა მომხმარებლის ბრალეული ქმედება. მომხმარებლის ბრალეული ქმედების საფუძველზე აუქციონის შედეგების გაუქმების შემთხვევაში, მომხმარებლის მიერ გადახდილი თანხის 10% არ ექვემდებარება დაბრუნებას და რჩება კომპანიის საკუთრებაში, როგორც პირგასამტეხლო. ამავდროულად, კომპანია უფლებამოსილია განახორციელოს საქართველოს კანონმდებლობით გათვალისწინებული სხვა ქმედებები. 
   3. კომპანიასა და სატრანსპორტო საშუალების მესაკუთრეს უფლება აქვს დაარედაქტიროს/შეცვალოს/განაახლოს სატრანსპორტო საშუალების მდგომარეობის შესახებ მითითებული ინფორმაცია. 
   4. კომპანიას  უფლება აქვს ყოველგვარი საფუძვლისა და წინასწარი შეტყობინების გარეშე გაზარდოს/შეამციროს სადეპოზიტო თანხის ოდენობა. 
   5. კომპანიას  უფლება აქვს ნებისმიერ დროს შეცვალოს აუქციონის წესები, რომლებიც ძალაში შევა მისი გამოქვეყნებისთანავე.  
8. პასუხისმგებლობა სატრანსპორტო საშუალების მდგომარეობაზე
   1. კომპანიის მეშვეობით სატრანსპორტო საშუალება აუქციონზე გამოდის იმ მდგომარეობაში, რა მდგომარეობაშიც წარმოდგენილია მომხმარებლის მიერ მისი დათვალიერების პროცესში, რაც გულისხმობს იმას, რომ კომპანია არ არის პასუხისმგებელი სატრანსპორტო საშუალების მდგომარეობასა და მის ვიზუალურ/მექანიკურ ან/და ღია/ფარულ ნაკლზე.  
   2. კომპანია არ გასცემს გარანტიას და შესაბამისად, არ არის პასუხისმგებელი აუქციონზე რეგისტრირებული და მომხმარებლის მიერ შეძენილი სატრანსპორტო საშუალების მდგომარეობაზე. ამდენად, კომპანიას არ აქვს ვალდებულება დაამტკიცოს სატრანსპორტო საშუალების გამართულობა და ზოგადი მდგომარეობა. 
   3. მომხმარებლის ვალდებულებაა, შეამოწმოს/გადაამოწმოს/გამოიკვლიოს/დაადასტუროს სატრანსპორტო საშუალების მდგომარეობა მისი ვინ კოდისა და ისტორიის მეშვეობით ან სხვა საშუალებით (მხოლოდ შესაბამისი საშუალების კომპანიასთან წინასწარ შეთანხმების შემდეგ) ავტომობილის აუქციონზე შეძენამდე. ამდენად, მომხმარებლის მიერ აუქციონზე ბიდის განთავსებით ის აცხადებს, რომ მის მიერ მოწონებულია სატრანსპორტო საშუალების მდგომარეობა და მას აღნიშნულთან დაკავშირებით პრეტენზია არ გააჩნია.  შესაბამისად, მას ერთმევა უფლება გამოთქვას პრეტენზია მის მდგომარეობასთან დაკავშირებით. 
   4. მომხმარებელი იზიარებს და სრულად ითვალისწინებს იმ რისკებს, რომ შესაძლოა აუქციონზე წარმოდგენილი სატრანსპორტო საშუალება შეიცავდეს ფარულ დაზიანებებს, რომლებზეც პასუხისმგებლობას არ იღებს  კომპანია.
   5. კომპანია არ გასცემს გარანტიას, რომ აუქციონზე წარმოდგენილ სატრანსპორტო საშუალებას ექნება გასაღები ან სხვა ნაწილი. 
   6. კომპანია არ გასცემს გარანტიას, რომ აუქციონზე წარმოდგენილი სატრანსპორტო საშუალება არის სატრანსპორტო ექსპლუატაციისათვისა და მოძრაობისათვის ვარგისი. აღნიშნული შესაძლოა არ იყოს მოძრაობისთვის ვარგის მდგომარეობაში და სჭირდებოდეს შეკეთება და გარკვეული სერვისის გავლა. ამდენად, აუქციონში მონაწილეობის მიღებით მომხმარებელი სრულად იზიარებს ზემოხსენებულ გარემოებას. 
   7. კომპანია არ გასცემს გარანტიას და არ არის პასუხისმგებელი სატრანსპორტო საშუალების როგორც ნივთობრივ, ასევე უფლებრივ ნაკლზე.  
   8. აუქციონის წარმართვის გარდა,  სხვა ყველა პროცედურაზე თუ საკითხზე პასუხისმგებლობა ეკისრება ავტომობილის მესაკუთრეს/კანონიერ მფლობელს (გამყიდველს) და მომხმარებელს.   
9. აუქციონის შედეგები
   1. აუქციონზე სატრანსპორტო საშუალების მოგების შემთხვევაში, გამარჯვებული მონაწილე ვალდებულია გადაიხადოს მისი სრული ღირებულება. 
   2. სატრანსპორტო საშუალების აუქციონზე მოგების შემდეგ, კომპანიის წარმომადგენელი მომხმარებელს დამატებით ინფორმაციას მიაწვდის მისი გადაფორმებისა და კომპანიის ტერიტორიიდან გაყვანის შესახებ. 
   3. აუქციონის მოგების შემდეგ, სატრანსპორტო საშუალების მესაკუთრე და აუქციონის გამარჯვებული ვალდებულნი არიან მიიღონ ყველა ზომა და წარადგინონ ყველა საჭირო დოკუმენტაცია,  კანონმდებლობის შესაბამისად სატრანსპორტო საშუალების მომხმარებლის საკუთრებაში დასარეგისტრირებლად. 
   4. აუქციონზე სატრანსპორტო საშუალების სრული ღირებულების გადახდის შემდეგ, აუქციონის გამარჯვებული ვალდებულია 3 (სამი) კალენდარული დღის განმავლობაში დაარეგისტრიროს აღნიშნული და თუ სატრანსპორტო საშუალება მდებარეობს კომპანიის ტერიტორიაზე, გაიყვანოს მისი საკუთრება ნასყიდობის ხელშეკრულებაზე ხელმოწერიდან 6 (ექვსი) დღის ვადაში, წინააღმდეგ შემთხვევაში მომხმარებელს დაეკისრება პირგასამტეხლო 20 (ოცი) აშშ დოლარის ექვივალენტი ლარში ოდენობით ყოველ ვადაგადაცილებულ დღეზე. მომხმარებელი ასევე ვალდებულია დაფაროს სატრანსპორტო საშუალების დგომის ღირებულება. კომპანიას უფლება აქვს საჯარიმო თანხის გადახდამდე და ყველა ვალდებულების შესრულებამდე  არ მისცეს მომხმარებელს სატრანსპორტო საშუალების ტერიტორიიდან გაყვანის უფლება. 
   5. სატრანსპორტო საშუალების მომხმარებლის საკუთრებაში რეგისტრაციასთან დაკავშირებულ ნებისმიერ საკითხზე, პასუხისმგებელია მისი მესაკუთრე და აუქციონის გამარჯვებული (მომხმარებელი). 
   6. მომხმარებელი ვალდებულია სრულად დაფაროს მის საკუთრებაში რეგისტრაციასთან/გაფორმებასთან დაკავშირებული ნებისმიერი გადასახადი, მათ შორის სახელმწიფო მოსაკრებელი.  
   7. კომპანიის ტერიტორიაზე სატრანსპორტო საშუალების დაშლა და შეკეთება აკრძალულია. აუქციონზე გამარჯვებულმა მონაწილემ საქართველოს კანონისა და უსაფრთხოების წესების დაცვით უნდა გამოიყვანოს მის მიერ შეძენილი სატრანსპორტო საშუალება კომპანიის ტერიტორიიდან. 
   8. სატრანსპორტო საშუალების მესაკუთრე უფლებამოსილია არ გადასცეს აუქციონის გამარჯვებულს სატრანსპორტო საშუალება საკუთრებაში/მფლობელობაში მისი სრული ღირებულების გადახდამდე.
10. დავათა გადაწყვეტა და გამოსაყენებელი სამართალი
    1. აუქციონის საფუძველზე მხარეთა შორის წარმოშობილი ნებისმიერი დავის გადაწყვეტა წარმოებს მოლაპარაკების გზით ურთიერთშეთანხმების მიღწევის მიზნით. 
    2. თუ მხარეთა შორის მოლაპარაკებამ შედეგი ვერ გამოიღო, ხელშეკრულებიდან გამომდინარე მხარეთა შორის წარმოშობილი ნებისმიერი დავა გადაწყდება საქართველოს მოქმედი სამართლით, ყველა სხვა სამართლის გამოყენების გამორიცხვით. 
    3. აუქციონის საფუძველზე ან/და მასთან მიმართებით წარმოშობილი ნებისმიერი დავა გადაწყდება საქართველოს სასამართლოს მიერ, სხვა ქვეყნ(ებ)ის სასამართლოს იურისდიქციის გამორიცხვით. 
    4. მხარეები თანხმდებიან, რომ აუქციონის სასარგებლოდ პირველი ინსტანციის სასამართლოს მიერ მიღებული გადაწყვეტილება ექვემდებარება დაუყოვნებლივ აღსრულებას საქართველოს სამოქალაქო საპროცესო კოდექსის 268-ე მუხლის 1-ლი პრიმა ნაწილის შესაბამისად. 
11. ფორს-მაჟორი
    1. კომპანია და მომხმარებელი არ არიან პასუხისმგებელნი თავიანთი ვალდებულების სრულ ან ნაწილობრივ შეუსრულებლობაზე, თუ ეს შეუსრულებლობა გამოწვეულია დაუძლეველი ძალით და აღნიშნული უშუალო ზემოქმედებას ახდენს წინამდებარე ხელშეკრულების შესრულებაზე. ასეთი გარემოება შეიძლება იყოს ხანძარი და აფეთქება (გარდა იმ შემთხვევისა, რაც გამოწვეულია რომელიმე მხარის მიერ), ქურდობა, სტიქიური უბედურება, სამხედრო მოქმედებები, აჯანყებები, არეულობები, სამოქალაქო ომები და მღელვარებები, ეპიდემია, კარანტინი, სახელმწიფო უწყებების მიერ მიღებული სავალდებულო ხასიათის რეგულაციები, გაფიცვა, ქიმიური ან/და ბიოლოგიური დაბინძურება ან/და მათ მიერ კონტროლს დაუქვემდებარებელი ნებისმიერი სხვა გარემოება. წინამდებარე ხელშეკრულების მიზნებისთვის, ეს გარემოებები მხოლოდ მაშინ მიიჩნევა ფორსმაჟორულ გარემოებად, თუ ისინი პირდაპირ გავლენას ახდენენ მხარის მიერ ხელშეკრულებით ნაკისრი ვალდებულებების შესრულებაზე. 
    2. ფორს-მაჟორული გარემოების დადგომის შემთხვევაში, რაც გამოიწვევს რომელიმე მხარის მიერ მისი ვალდებულების შესრულების ან უფლების განხორციელების შეუძლებლობას, მხარე, რომელიც ვერ ასრულებს ხელშეკრულებით ნაკისრ ვალდებულებას ფორსმაჟორული გარემოების ზემოქმედების გამო, ვალდებულია ასეთი გარემოების დადგომისთანავე აცნობოს მეორე მხარეს ფორს-მაჟორული გარემოების დადგომის თაობაზე და ასეთ შემთხვევაში, მის მიერ ვალდებულებების შესრულების ვადა გადაიწევს ფორს-მაჟორული გარემოების მოქმედების ვადით. 
    3. თუ ფორს-მაჟორული გარემოების ზემოქმედება გრძელდება 20 (ოც) კალენდარულ დღეზე მეტ ხანს, მხარეები განიხილავენ ხელშეკრულების შეწყვეტის საკითხს.
12. პერსონალური მონაცემების დამუშავება
    1. აუქციონის მომხმარებელი აუქციონზე რეგისტრაციით აცხადებს თანხმობას, რომ კომპანიამ აუქციონის პირობებით განსაზღვრული პროდუქტის ან/და ნებისმიერი სხვა შესაბამისი სახის მომსახურების შეთავაზების/გაწევის მიზნით, შეაგროვოს/დაამუშაოს, შეინახოს, დაარქივოს აუქციონის მონაწილის შესახებ პერსონალური ინფორმაცია, (მათ შორის განსაკუთრებული კატეგორიის მონაცემები), საკონტაქტო ინფორმაცია (ტელეფონის ნომერი, ელ-ფოსტა, მისამართი და სხვა);
    2. აუქციონის მონაწილის პერსონალური მონაცემების დამუშავება ხდება: მომსახურების გაწევის, მომსახურების ხარისხის გაუმჯობესების ან/და მისი განახლების მიზნით; კვლევების, გამოკითხვების ჩატარების, მათ შორის, სტატისტიკური კვლევების ჩატარების და ანალიტიკური მიზნებისთვის; აუქციონის მონაწილის მიერ დასმული კითხვების დამუშავებისა და მასზე პასუხის გაცემის, გამოხმაურების მიზნით. 
    3. წინამდებარე ხელშეკრულებაზე ხელმოწერით აუქციონის მომხმარებელი თანხმობას აცხადებს, რომ კომპანია უფლებამოსილია მისი პერსონალური მონაცემები (სახელი, გვარი, პირადი ნომერი, საკონტაქტო ინფორმაცია: ტელეფონის ნომერი, ელ-ფოსტა) დაამუშავოს პირდაპირი მარკეტინგის განხორციელების მიზნით. აუქციონის მომხმარებელი თანხმობას აცხადებს, რომ მიიღოს მის მიერ მითითებულ საკონტაქტო ნომერზე აუქციონის ჩატარების შესახებ სიახლეები და დამატებითი ინფორმაცია. 
    4. კომპანია როგორც მონაცემთა დამუშავებაზე პასუხისმგებელი პირი, იძლევა გარანტიას, რომ მონაცემთა სუბიექტების შესახებ მოპოვებული ნებისმიერი სახის ინფორმაცია მკაცრად იქნება დაცული მის მიერ, მესამე მხარისათვის პერსონალური მონაცემების გაზიარება მოხდება მხოლოდ მომსახურების მიზნებიდან გამომდინარე და კანონით განსაზღვრული შემთხვევების შესაბამისად. 
    5. აუქციონის მონაწილეს ნებისმიერ დროს შეუძლია უარი თქვას, შპს „ლაიონ აუქციონი“-ს მიერ მისი პერსონალური მონაცემების დამუშავების შესახებ, წერილობითი შეტყობინების შემდეგ ელ-ფოსტაზე: contact@lionauctions.com გაგზავნის გზით, რა შემთხვევაშიც კომპანია დაუყოვნებლივ შეწყვეტს მონაცემთა სუბიექტის იმ პერსონალური მონაცემების დამუშავებას, რომლის დამუშავებაზეც მან განაცხადა უარი.
13. დამატებითი დებულებები
    1. რომელიმე მხარის მიერ წინამდებარე წესებით მინიჭებული უფლებების გამოუყენებლობა, ან დროებით არ გამოყენება არ განიმარტება როგორც ამ უფლებაზე უარის თქმა.
    2. ყველა დანართი (ასეთის არსებობის შემთხვევაში), რომელიც თან ერთვის წინამდებარე წესებს წარმოადგენს მის განუყოფელ ნაწილს.
    3. წინამდებარე წესების რომელიმე დებულების ბათილობა არ იწვევს მთლიანად წესების ბათილობას. ბათილი დებულების ნაცვლად გამოიყენება იმგვარი დებულება, რომლითაც უფრო ადვილად მიიღწევა ამ წესებით (და მათ შორის, ბათილი დებულებით) გათვალისწინებული მიზანი. 
    4. მხარეები თანხმდებიან, რომ მხარეთა შორის დასაშვებია დისტანციური კომუნიკაცია ელექტრონული ფორმით (WhatsApp, Viber, E-mail, SMS შეტყობინებები, Signify და სხვა ანალოგიური საშუალებები). მხარეები ადასტურებენ, რომ ნებისმიერი შეთანხმება, განცხადება, გარიგება ან ხელშეკრულება, რომელიც შესრულებულია და/ან დადასტურებულია ელექტრონული ფორმით, მათ შორის SMS შეტყობინებით, ექნება მატერიალური დოკუმენტისა და აუქციონის მომხმარებლის მიერ პირადი ხელმოწერით დადასტურებული დოკუმენტის ტოლფასი და თანაბარი იურიდიული ძალა. შესაბამისად, ელექტრონული ფორმით (მათ შორის SMS შეტყობინებით) შესრულებული ან ხელმოწერილი შეთანხმების/განცხადების/გარიგების/ხელშეკრულების კანონიერება და იურიდიული ძალა არ შეიძლება გახდეს მხარეთა შორის დავის საგანი.
    5. წინამდებარე დოკუმენტი ძალაშია 2025 წლის 21 ოქტომბრიდან.